Celas de exposicións

Coa nova remodelación e reconversión en centro sociocultural de O Vello Cárcere, as celas, antigos espazos de reclusión, ábrense agora coma unha plataforma de difusión da arte de numerosos artistas, así como un espazo para a memoria histórica grazas á exposición permanente que xira entorno á guerra civil e á posguerra.

Na planta baixa do patio de homes atópanse as salas adicadas a exposición permanentes. O resto do edificio acolle exposicións de carácter temporal que se poden atopar no noso calendario.

Na zona das celas de mulleres existen, repartidas en dous andares, 21 celas/salas de exposición temporal. A zona de homes acolle na planta baixa a exposición permanente sobre a guerra civil e a posguerra, mentres que o primeiro e segundo andar constitúen salas de exposicións temporais, facendo un total de 26 celas.

Exposicións permanentes

  • O VELLO CÁRCERE DA GUERRA Á POSGUERRA.  Esta exposición xira entorno a ese período político e histórico de España no que esta prisión pasou a albergar a moitas presas e presos políticos. A mostra é froito dunha colaboración entre o Concello de Lugo e a Asociación para a Recuperación da Memoria Histórica. Comeza na primeira cela colectiva e discorre por todas as da planta baixa semicircular (no antigo bloque dos homes).
  • ELAS. Trátase dun proxecto en colaboración entre Aurora Marco, que é investigadora, historiadora e profesora da USC, e varias artistas locais: Chelo Rodríguez, Ehlaba Carballo, Irene Silva Xiráldez, María Manuela, María Xesús Díaz, Novais, Sabela Arias Castro e Vanessa Lodeiro. Tras a investigación de Aurora sobre mulleres galegas que destacaron como artistas en diferentes etapas da historia galega e en distintos campos de creación, as artistas crearon unha serie de pezas en homenaxe a ELAS.
  • SERIE AMARILLA (1995-2003) de Xaime Quessada ( artista ourensán fundamental para entender a pintura do século XX en Galicia). Esta exposición poderá visitarse ata o 2023. Nela o artista retrata o sufrimento humano de distintos pobos e por distintos motivos: guerras, fames negras, violacións, etc. Emprega cores pasteis para facer as escenas máis amables e evitar que a espectadora ou espectador afaste a mirada. Atópase no segundo andar do semicírculo..