É xaneiro, e como primeiro #LibroSalvado deste 2025 traemos “Modos de ver” (1972), un ensaio sobre arte e comunicación visual escrito polo recoñecido crítico de arte, escritor e pintor John Berger (Londres, 1926 – Antony, Francia, 2017). Sabiades que foi un dos libros máis revolucionarios do panorama da Teoría da Arte do momento
A comezos dos anos setenta, Berger conducía un programa de televisión na BBC (“Ways of seeing”) co que, nun medio de comunicación tan potencial, pretendía romper coa barreira da intelectualidade e achegar a arte e a cultura visual ao público xeral. O seu grande éxito derivou na publicación en papel que hoxe vos recomendamos, toda unha crítica posmoderna á cultura e á estética occidental.
Nela ponse de manifesto a manipulación da ollada e da imaxe, e analízanse aspectos relacionados coa cuestión da interpretación: a arte como propiedade, o papel da muller como obxecto pictórico, a pintura e a publicidade ou a transformación do significado da obra no marco da súa reprodución. Temas que aínda seguen vixentes a día de hoxe, e que nos levan a aprender a ollar doutro xeito unha obra de arte.
Velaquí a ligazón aos programas sobre os que versa este libro:
http://www.youtube.com/watch?v=1J-CXyx58T8…
Boa lectura! 