💬 En 1989, o historietista Daniel Clowes comezou a publicar “Eightball”, un “comic book” que conxugaba historietas curtas autoconclusivas con outros relatos de maior extensión. Estes últimos convertíronse posteriormente en publicacións independentes, como foi o caso da novela gráfica “Ghost World” (1997), o #LibroSalvado deste mes de xuño. 📖
👉 Dúas amigas. Anos 90. Fin do curso escolar. Tras rematar o instituto, Enid e Rebecca vagan pola cidade sen rumbo fixo. Atópanse nese punto intermedio entre a adolescencia e a adultez, nun momento cheo de incertezas. O verán que teñen por diante supoñerá un punto de inflexión no seu camiño á madurez.
🌀 O que inicialmente pode semellar unha sorte de viaxe adolescente, vai moito máis aló. Estas páxinas, sumerxidas nun permanente e característico azul pálido, plantexan unha dura crítica social e existencial a través da súa acidez e humor negro sen estar, á súa vez, exentas de drama.
📽️ Considerada hoxe en día como unha obra de culto, “Ghost World” tivo tamén a súa adaptación cinematográfica homónima no ano 2001, dirixida por Terry Zwigoff e guionzada por Zwigoff e máis polo propio Clowes.