A exposición permanente ‘O Vello Cárcere: da Guerra á Posguerra’ foi organizada polo Concello de Lugo e a Asociación para a Recuperación da Memoria Histórica (A.R.M.H). 

Esta mostra inaugúrase no ano 2017, coincidindo coa apertura do centro sociocultural, e xurde coa vontade de dotar a este espazo dun novo uso conciliador co seu pasado represivo. A etapa da guerra civil e da posguerra dentro desta prisión queda ó descuberto a través das súas vítimas. Son as testemuñas e os recordos das persoas que estiveron retidas dentro destes muros por motivos inxustificados, os que nos desvelarán as duras condicións ás que foron sometidas. 

‘O Vello Cárcere: da Guerra á Posguerra’ convértese, deste xeito, nunha homenaxe e nun espazo de encontro para dialogar e reflexionar sobre o pasado traumático que supuxo a guerra e a ditadura. É, por tanto, unha mostra viva grazas tamén á actual campaña de mecenado cultural ‘A Túa Memoria’, que permitiu incrementar os fondos da exposición.

A exposición permanente «Elas» é froito do traballo da investigadora, ensaísta e mestra Aurora Marco. Durante máis de vinte anos, levou a cabo un exhaustivo traballo de investigación acerca de mulleres galegas que sobresaíron ao longo da historia en diferentes campos e disciplinas. Como resultado deste labor xorde a publicación exposta nesta mostra, cuxa edición se limitou a 155 exemplares. Nela recóllense 410 biografías destas mulleres galegas.

Esta exposición está así mesmo composta por serigrafías realizadas por artistas galegas contemporáneas, que tomaron como inspiración as historias aquí recollidas. Elas son Chelo Rodríguez, Ehlaba Carballo, Irene Silva Xiráldez, María Manuela, María Xesús Díaz, Novais, Sabela Arias Castro e Vanessa Lodeiro.