«Dise que o mundo das mulleres é máis diverso que o dos homes, que teñen máis matices. Probabelmente é verdade. Dentro das 36 obras que aquí se expoñen hai mulleres que traballan, mulleres en traxe tradicional, nais, mulleres doutras culturas, de grandes melenas ou sen elas, mulleres que tocan ou parecen tocar un instrumento, mulleres con xoias, mulleres á moda. Na súa realización, Xulio Fontes utiliza, como nel xa é habitual, lenzos e tamén taboleiros e palés. Pero sobre todo chama a nosa atención a cor, as súas cores plenas que lle dan tanta vida ás figuras e, por último, ese releve, ese volume que Xulio consegue grazas a materiais como as cunchas, a cortiza, a madeira, as cascas de noz ou os botóns. Son formas de ver a muller na súa pluralidade, destacando sempre a gran viveza que trasmiten. Xulio Fontes é un pintor felizmente atípico, sen imposturas e valioso polo fondura que se intúe no seu estilo.»
Manuel Veiga
Bloque de mulleres – 2ª planta
Do 5 de xuño ao 30 de xullo do 2026
